Katamaṁ taṁ rūpaṁ no upādā upādinnaṁ? Kammassa katattā phoṭṭhabbāyatanaṁ āpodhātu— idaṁ taṁ rūpaṁ no upādā upādinnaṁ. Katamaṁ taṁ rūpaṁ no upādā anupādinnaṁ? Na kammassa katattā phoṭṭhabbāyatanaṁ āpodhātu— idaṁ taṁ rūpaṁ no upādā anupādinnaṁ. Katamaṁ taṁ rūpaṁ upādā upādinnupādāniyaṁ? Cakkhāyatanaṁ …pe… kāyāyatanaṁ, itthindriyaṁ purisindriyaṁ jīvitindriyaṁ, yaṁ vā panaññampi atthi rūpaṁ kammassa katattā rūpāyatanaṁ gandhāyatanaṁ rasāyatanaṁ ākāsadhātu rūpassa upacayo rūpassa santati kabaḷīkāro āhāro— idaṁ taṁ rūpaṁ upādā upādinnupādāniyaṁ. Katamaṁ taṁ rūpaṁ upādā anupādinnupādāniyaṁ? Saddāyatanaṁ kāyaviññatti vacīviññatti rūpassa lahutā rūpassa mudutā rūpassa kammaññatā rūpassa jaratā rūpassa aniccatā, yaṁ vā panaññampi atthi rūpaṁ na kammassa katattā rūpāyatanaṁ gandhāyatanaṁ rasāyatanaṁ ākāsadhātu rūpassa upacayo rūpassa santati kabaḷīkāro āhāro— idaṁ taṁ rūpaṁ upādā anupādinnupādāniyaṁ. Katamaṁ taṁ rūpaṁ no upādā upādinnupādāniyaṁ? Kammassa katattā phoṭṭhabbāyatanaṁ āpodhātu— idaṁ taṁ rūpaṁ no upādā upādinnupādāniyaṁ. Katamaṁ taṁ rūpaṁ no upādā anupādinnupādāniyaṁ? Na kammassa katattā phoṭṭhabbāyatanaṁ āpodhātu— idaṁ taṁ rūpaṁ no upādā anupādinnupādāniyaṁ. Katamaṁ taṁ rūpaṁ upādā sappaṭighaṁ? Cakkhāyatanaṁ …pe… rasāyatanaṁ— idaṁ taṁ rūpaṁ upādā sappaṭighaṁ.