Katamaṁ taṁ rūpaṁ upādinnaṁ anidassanaṁ? Cakkhāyatanaṁ …pe… kāyāyatanaṁ, itthindriyaṁ purisindriyaṁ jīvitindriyaṁ, yaṁ vā panaññampi atthi rūpaṁ kammassa katattā gandhāyatanaṁ rasāyatanaṁ phoṭṭhabbāyatanaṁ ākāsadhātu āpodhātu rūpassa upacayo rūpassa santati kabaḷīkāro āhāro— idaṁ taṁ rūpaṁ upādinnaṁ anidassanaṁ. Katamaṁ taṁ rūpaṁ anupādinnaṁ sanidassanaṁ? Na kammassa katattā rūpāyatanaṁ— idaṁ taṁ rūpaṁ anupādinnaṁ sanidassanaṁ. Katamaṁ taṁ rūpaṁ anupādinnaṁ anidassanaṁ? Saddāyatanaṁ kāyaviññatti vacīviññatti rūpassa lahutā rūpassa mudutā rūpassa kammaññatā rūpassa jaratā rūpassa aniccatā, yaṁ vā panaññampi atthi rūpaṁ na kammassa katattā gandhāyatanaṁ rasāyatanaṁ phoṭṭhabbāyatanaṁ ākāsadhātu āpodhātu rūpassa upacayo rūpassa santati kabaḷīkāro āhāro— idaṁ taṁ rūpaṁ anupādinnaṁ anidassanaṁ. Katamaṁ taṁ rūpaṁ upādinnaṁ sappaṭighaṁ? Cakkhāyatanaṁ …pe… kāyāyatanaṁ, yaṁ vā panaññampi atthi rūpaṁ kammassa katattā rūpāyatanaṁ gandhāyatanaṁ rasāyatanaṁ phoṭṭhabbāyatanaṁ— idaṁ taṁ rūpaṁ upādinnaṁ sappaṭighaṁ. Katamaṁ taṁ rūpaṁ upādinnaṁ appaṭighaṁ? Itthindriyaṁ purisindriyaṁ jīvitindriyaṁ, yaṁ vā panaññampi atthi rūpaṁ kammassa katattā ākāsadhātu āpodhātu rūpassa upacayo rūpassa santati kabaḷīkāro āhāro— idaṁ taṁ rūpaṁ upādinnaṁ appaṭighaṁ. Katamaṁ taṁ rūpaṁ anupādinnaṁ sappaṭighaṁ? Saddāyatanaṁ, yaṁ vā panaññampi atthi rūpaṁ na kammassa katattā rūpāyatanaṁ gandhāyatanaṁ rasāyatanaṁ phoṭṭhabbāyatanaṁ— idaṁ taṁ rūpaṁ anupādinnaṁ sappaṭighaṁ.