Katamaṁ taṁ rūpaṁ upādinnaṁ oḷārikaṁ? Cakkhāyatanaṁ …pe… kāyāyatanaṁ, yaṁ vā panaññampi atthi rūpaṁ kammassa katattā rūpāyatanaṁ gandhāyatanaṁ rasāyatanaṁ phoṭṭhabbāyatanaṁ— idaṁ taṁ rūpaṁ upādinnaṁ oḷārikaṁ. Katamaṁ taṁ rūpaṁ upādinnaṁ sukhumaṁ? Itthindriyaṁ purisindriyaṁ jīvitindriyaṁ, yaṁ vā panaññampi atthi rūpaṁ kammassa katattā ākāsadhātu āpodhātu rūpassa upacayo rūpassa santati kabaḷīkāro āhāro— idaṁ taṁ rūpaṁ upādinnaṁ sukhumaṁ. Katamaṁ taṁ rūpaṁ anupādinnaṁ oḷārikaṁ? Saddāyatanaṁ, yaṁ vā panaññampi atthi rūpaṁ na kammassa katattā rūpāyatanaṁ gandhāyatanaṁ rasāyatanaṁ phoṭṭhabbāyatanaṁ— idaṁ taṁ rūpaṁ anupādinnaṁ oḷārikaṁ. Katamaṁ taṁ rūpaṁ anupādinnaṁ sukhumaṁ? Kāyaviññatti vacīviññatti rūpassa lahutā rūpassa mudutā rūpassa kammaññatā rūpassa jaratā rūpassa aniccatā, yaṁ vā panaññampi atthi rūpaṁ na kammassa katattā ākāsadhātu āpodhātu rūpassa upacayo rūpassa santati kabaḷīkāro āhāro— idaṁ taṁ rūpaṁ anupādinnaṁ sukhumaṁ. Katamaṁ taṁ rūpaṁ upādinnaṁ dūre? Itthindriyaṁ purisindriyaṁ jīvitindriyaṁ, yaṁ vā panaññampi atthi rūpaṁ kammassa katattā ākāsadhātu āpodhātu rūpassa upacayo rūpassa santati kabaḷīkāro āhāro— idaṁ taṁ rūpaṁ upādinnaṁ dūre. Katamaṁ taṁ rūpaṁ upādinnaṁ santike? Cakkhāyatanaṁ …pe… kāyāyatanaṁ, yaṁ vā panaññampi atthi rūpaṁ kammassa katattā rūpāyatanaṁ gandhāyatanaṁ rasāyatanaṁ phoṭṭhabbāyatanaṁ— idaṁ taṁ rūpaṁ upādinnaṁ santike.