Katamaṁ taṁ rūpaṁ anupādinnaṁ dūre? Kāyaviññatti vacīviññatti rūpassa lahutā rūpassa mudutā rūpassa kammaññatā rūpassa jaratā rūpassa aniccatā, yaṁ vā panaññampi atthi rūpaṁ na kammassa katattā ākāsadhātu āpodhātu rūpassa upacayo rūpassa santati kabaḷīkāro āhāro— idaṁ taṁ rūpaṁ anupādinnaṁ dūre. Katamaṁ taṁ rūpaṁ anupādinnaṁ santike? Saddāyatanaṁ, yaṁ vā panaññampi atthi rūpaṁ na kammassa katattā rūpāyatanaṁ gandhāyatanaṁ rasāyatanaṁ phoṭṭhabbāyatanaṁ— idaṁ taṁ rūpaṁ anupādinnaṁ santike. Katamaṁ taṁ rūpaṁ upādinnupādāniyaṁ sanidassanaṁ? Kammassa katattā rūpāyatanaṁ— idaṁ taṁ rūpaṁ upādinnupādāniyaṁ sanidassanaṁ. Katamaṁ taṁ rūpaṁ upādinnupādāniyaṁ anidassanaṁ? Cakkhāyatanaṁ …pe… kāyāyatanaṁ, itthindriyaṁ purisindriyaṁ jīvitindriyaṁ, yaṁ vā panaññampi atthi rūpaṁ kammassa katattā gandhāyatanaṁ rasāyatanaṁ phoṭṭhabbāyatanaṁ ākāsadhātu āpodhātu rūpassa upacayo rūpassa santati kabaḷīkāro āhāro— idaṁ taṁ rūpaṁ upādinnupādāniyaṁ anidassanaṁ. Katamaṁ taṁ rūpaṁ anupādinnupādāniyaṁ sanidassanaṁ? Na kammassa katattā rūpāyatanaṁ— idaṁ taṁ rūpaṁ anupādinnupādāniyaṁ sanidassanaṁ.