Katame dhammā niyatā? Cattāro diṭṭhigatasampayuttacittuppādā, dve domanassasahagatacittuppādā— ime dhammā siyā niyatā siyā aniyatā. Cattāro maggā apariyāpannā— ime dhammā niyatā. Katame dhammā aniyatā? Cattāro diṭṭhigatavippayuttalobhasahagatacittuppādā, vicikicchāsahagato cittuppādo, uddhaccasahagato cittuppādo, tīsu bhūmīsu kusalaṁ, catūsu bhūmīsu vipāko, tīsu bhūmīsu kiriyābyākataṁ, rūpañca, nibbānañca— ime dhammā aniyatā. 2.4.2.13.17. Sauttaraduka Katame dhammā sauttarā? Tīsu bhūmīsu kusalaṁ, akusalaṁ, tīsu bhūmīsu vipāko, tīsu bhūmīsu kiriyābyākataṁ, sabbañca rūpaṁ— ime dhammā sauttarā. Katame dhammā anuttarā? Cattāro maggā apariyāpannā, cattāri ca sāmaññaphalāni, nibbānañca— ime dhammā anuttarā. 2.4.2.13.18. Saraṇaduka Katame dhammā saraṇā? Dvādasa akusalacittuppādā— ime dhammā saraṇā. Katame dhammā araṇā? Catūsu bhūmīsu kusalaṁ, catūsu bhūmīsu vipāko, tīsu bhūmīsu kiriyābyākataṁ, rūpañca, nibbānañca— ime dhammā araṇā. Atthuddhāro niṭṭhito. Dhammasaṅgaṇīpakaraṇaṁ niṭṭhitaṁ.