นภํ ผเลยฺย ปฐวี จเลยฺย

สพฺเพว ๑ ปาณา อุท สนฺตเสยฺยุํ

สลฺลมฺปิ เจ อุรสิ กมฺปเสยฺยุํ ๒

อุปธีสุ ตาณํ น กโรนฺติ พุทฺธาติ ฯ

อถ โข มาโร ปาปิมา ชานาติ มํ ภควา ชานาติ มํ สุคโตติ ทุกฺขี ทุมฺมโน ตตฺเถวนฺตรธายีติ ฯ

สตฺตมํ สุปฺปติสุตฺตํ

[๔๓๔] เอวมฺเม สุตํ เอกํ สมยํ ภควา ราชคเห วิหรติ เวฬุวเน กลนฺทกนิวาเป ฯ อถ โข ภควา พหุเทว รตฺตึ อชฺโฌกาเส ๓ จงฺกมิตฺวา รตฺติยา ปจฺจูสสมยํ ปาเท ปกฺขาเลตฺวา วิหารํ ปวิสิตฺวา ทกฺขิเณน ปสฺเสน สีหเสยฺยํ กปฺเปสิ ปาเทน ปาทํ อจฺจาธาย สโต สมฺปชาโน อุฏฺฐานสญฺญํ มนสิกริตฺวา ฯ

[๔๓๕] อถ โข มาโร ปาปิมา เยน ภควา เตนุปสงฺกมิ อุปสงฺกมิตฺวา ภควนฺตํ คาถาย อชฺฌภาสิ

กึ โสปฺปสิ กึ นุ โสปฺปสิ

กิมิทํ โสปฺปสิ ทุพฺภโต ๔ วิย

สุญฺญมคารนฺติ โสปฺปสิ

กิมิทํ โสปฺปสิ สุริเย อุคฺคเตติ ฯ

#๑ ม. ยุ. สพฺเพปิ ฯ ๒ สี. ยุ. ปกมฺปเยยฺยุํ ฯ ม. กปฺปเรยฺย ฯ ๓ ม. อพฺโภกาเส ฯ #๔ ม. ทุพฺภโค ฯ ยุ. ทุพฺภโย ฯ