อพฺยากตมูเลน เอกมูลํ ฯ เย วา ปน อพฺยากตมูเลน เอกมูลา สพฺเพ เต ธมฺมา อพฺยากตาติ: อามนฺตา ฯ เยเกจิ อพฺยากตมูเลน เอกมูลา ธมฺมา สพฺเพ เต อพฺยากตมูเลน อญฺญมญฺญมูลาติ: มูลานิ ยานิ เอกโต อุปฺปชฺชนฺติ อพฺยากตมูลานิ เอกมูลานิ เจว อญฺญมญฺญมูลานิ จ อวเสสา อพฺยากตมูลสหชาตา ธมฺมา อพฺยากตมูเลน เอกมูลา น จ อญฺญมญฺญมูลา ฯ เย วา ปน อพฺยากตมูเลน อญฺญมญฺญมูลา สพฺเพ เต ธมฺมา อพฺยากตาติ: อามนฺตา ฯ

[๑๕] เยเกจิ อพฺยากตา ธมฺมา สพฺเพ เต อพฺยากตมูลมูลาติ: ตีเณว อพฺยากตมูลมูลานิ อวเสสา อพฺยากตา ธมฺมา น อพฺยากตมูลมูลา ฯ เย วา ปน อพฺยากตมูลมูลา สพฺเพ เต ธมฺมา อพฺยากตาติ: อามนฺตา ฯ เยเกจิ อพฺยากตา ธมฺมา สพฺเพ เต อพฺยากตมูเลน เอกมูลมูลาติ: อเหตุกํ อพฺยากตํ อพฺยากตมูเลน น เอกมูลมูลํ สเหตุกํ อพฺยากตํ อพฺยากตมูเลน เอกมูลมูลํ ฯ เย วา ปน อพฺยากตมูเลน เอกมูลมูลา สพฺเพ เต ธมฺมา อพฺยากตาติ: อามนฺตา ฯ เยเกจิ อพฺยากตมูเลน เอกมูลมูลา ธมฺมา สพฺเพ เต อพฺยากตมูเลน อญฺญมญฺญมูลมูลาติ: มูลานิ ยานิ เอกโต อุปฺปชฺชนฺติ อพฺยากตมูลานิ เอกมูลมูลานิ เจว อญฺญมญฺญมูลมูลานิ จ อวเสสา อพฺยากตมูลสหชาตา ธมฺมา อพฺยากตมูเลน เอกมูลมูลา น จ อญฺญมญฺญมูลมูลา ฯ เย วา ปน อพฺยากตมูเลน อญฺญมญฺญมูลมูลา สพฺเพ เต ธมฺมา อพฺยากตาติ: อามนฺตา ฯ