สจฺจา นนิโรธสจฺจนฺติ: ฯเปฯ นสจฺจา นมคฺคสจฺจนฺติ: อามนฺตา ฯ นสมุทโย นสจฺจนฺติ: สมุทยํ ฐเปตฺวา อวเสสา สจฺจา นสมุทโย สจฺจา สมุทยญฺจ สจฺจญฺจ ฐเปตฺวา อวเสสา น เจว สมุทโย น จ สจฺจา ฯเปฯ นนิโรโธ นสจฺจนฺติ: นิโรธํ ฐเปตฺวา ฯเปฯ นมคฺโค นสจฺจนฺติ: มคฺคํ ฐเปตฺวา อวเสสา สจฺจา นมคฺโค สจฺจา มคฺคญฺจ สจฺจญฺจ ฐเปตฺวา อวเสสา น เจว มคฺโค น จ สจฺจา ฯ นสจฺจา นทุกฺขสจฺจนฺติ: อามนฺตา ฯ นมคฺโค นสจฺจนฺติ: มคฺคํ ฐเปตฺวา อวเสสา สจฺจา นมคฺโค สจฺจา มคฺคญฺจ สจฺจญฺจ ฐเปตฺวา อวเสสา น เจว มคฺโค น จ สจฺจา ฯ นสจฺจา นสมุทยสจฺจนฺติ: ฯเปฯ นสจฺจา นนิโรธสจฺจนฺติ: อามนฺตา ฯ
ปณฺณตฺติวาโร ฯ
________________
ปวตฺติวาโร
[๘๓๓] ยสฺส ทุกฺขสจฺจํ อุปฺปชฺชติ ตสฺส สมุทยสจฺจํ อุปฺปชฺชตีติ: สพฺเพสํ อุปปชฺชนฺตานํ ปวตฺเต ตณฺหาวิปฺปยุตฺตจิตฺตสฺส อุปฺปาทกฺขเณ เตสํ ทุกฺขสจฺจํ อุปฺปชฺชติ โน จ เตสํ สมุทยสจฺจํ อุปฺปชฺชติ ตณฺหาย อุปฺปาทกฺขเณ เตสํ ทุกฺขสจฺจญฺจ อุปฺปชฺชติ สมุทยสจฺจญฺจ อุปฺปชฺชติ ฯ ยสฺส วา ปน สมุทยสจฺจํ อุปฺปชฺชติ ตสฺส ทุกฺขสจฺจํ อุปฺปชฺชตีติ: อามนฺตา ฯ
[๘๓๔] ยสฺส ทุกฺขสจฺจํ อุปฺปชฺชติ ตสฺส มคฺคสจฺจํ อุปฺปชฺชตีติ: