[๔๕๒] สุขกามา รโหสีลา วคฺคพนฺธา อปารุตา ๑

กสฺส ๒ นุ อชฺช อาราเม ทหรา วุฑฺฒา จ อจฺฉเร

อติกฺกนฺตวนถา ธีรา นโม เตสํ มเหสินํ

เย อุสฺสุกฺกมฺหิ โลกมฺหิ วิหรนฺติ อนุสฺสุกา

เต เฉตฺวา มจฺจุโน ชาลํ ตนฺตํ ๓ มายาวิโน ทฬฺหํ

สนฺทาลยนฺตา ๔ คจฺฉนฺติ โก เตสํ คติมาปเย ฯ

[๔๕๓] กทาหํ มิถิลํ ผีตํ วิภตฺตํ ภาคโส มิตํ

ปหาย ปพฺพชิสฺสามิ ตํ กทา ๕ สุ ภวิสฺสติ ฯ

กทาหํ มิถิลํ ผีตํ วิสาลํ สพฺพโต ปภํ

ปหาย ปพฺพชิสฺสามิ ตํ กทา สุ ภวิสฺสติ ฯ

กทาหํ มิถิลํ ผีตํ พหุปาการโตรณํ

ปหาย ปพฺพชิสฺสามิ ตํ กทา สุ ภวิสฺสติ ฯ

กทาหํ มิถิลํ ผีตํ ทฬฺหมฏฺฏาลโกฏฺฐกํ

ปหาย ปพฺพชิสฺสามิ ตํ กทา สุ ภวิสฺสติ ฯ

กทาหํ มิถิลํ ผีตํ สุวิภตฺตํ มหาปถํ

ปหาย ปพฺพชิสฺสามิ ตํ กทา สุ ภวิสฺสติ ฯ

กทาหํ มิถิลํ ผีตํ สุวิภตฺตนฺตราปณํ

ปหาย ปพฺพชิสฺสามิ ตํ กทา สุ ภวิสฺสติ ฯ

กทาหํ มิถิลํ ผีตํ ควสฺสรถปีฬิตํ

ปหาย ปพฺพชิสฺสามิ ตํ กทา สุ ภวิสฺสติ ฯ #๑ ม. วธพนฺธา อปารตา ฯ ๒ สี. ยุ. เกสํ ฯ ๓ ม. ตตํ ฯ ๔ ม. ฉินฺนาลยตฺตา ฯ #๕ ม. กุทาสฺสุ ฯ อิโต ปรํ อีทิสเมว ฯ