กจฺจิ ยาปนียํ ภนฺเต วาตานมวิยตฺตตา ฯ

กจฺจิ อกสิรา วุตฺติ ลภสิ ปิณฺฑิยาปนํ ๑

อปฺปาพาโธ ๒ จสิ กจฺจิ จกฺขุ น ปริหายติ ฯ

[๘๔๓] ตํ คุโณ ปฏิสมฺโมทิ เวเทหํ วินเย รตํ

ยาปนียํ มหาราช สพฺพเมตํ ตทูภยํ ฯ

กจฺจิ ตุยฺหํปิ เวเทห ปจฺจนฺตา น พลียเร

กจฺจิ อโรคํ โยคฺคนฺเต กจฺจิ วหติ วาหนํ

กจฺจิ เต พฺยาธิโย นตฺถิ สรีรสฺสุปตาปิยา ๓ ฯ

[๘๔๔] ปฏิสมฺโมทิโต ราชา ตโต ปุจฺฉิ อนนฺตรา

อตฺถํ ธมฺมญฺจ ญายญฺจ ธมฺมกาโม รเถสโภ ฯ

กถํ ธมฺมญฺจเร มจฺโจ มาตาปิตูสุ กสฺสป

กถญฺจเร อาจริเย ปุตฺตทาเร กถญฺจเร ฯ

กถญฺจเรยฺย วุฑฺเฒสุ กถํ สมณพฺราหฺมเณ

กถญฺจ พลกายสฺมึ กถํ ชนปเท จเร ฯ

กถํ ธมฺมญฺจริตฺวาน เปจฺจ ๔ คจฺฉนฺติ สุคฺคตึ

กถญฺเจเก อธมฺมฏฺฐา ปตนฺติ นิรยํ อโธ ฯ

[๘๔๕] เวเทหสฺส วโจ สุตฺวา กสฺสโป เอตทพฺรวิ

สุโณหิ เม มหาราช สจฺจํ อวิตถํ ปทํ ฯ

นตฺถิ ธมฺมจริตสฺส ผลํ กลฺยาณปาปกํ #๑ ม. ปิณฺฑยาปนํ ฯ ๒ ม. อปาพาโธ ฯ ๓ สี. ยุ. สรีรสฺสุปตาปิกา ฯ #๔ ม. มจฺจา ฯ