<b>Ye kecime samaṇabrāhmaṇāse,</b> (nandāti bhagavā) <b>Diṭṭhassutenāpi vadanti suddhiṁ;</b> <b>Sīlabbatenāpi vadanti suddhiṁ,</b> <b>Anekarūpena vadanti suddhiṁ;</b> <b>Kiñcāpi te tattha yatā caranti,</b> <b>Nātariṁsu jātijaranti brūmi. </b> <b>Ye kecime samaṇabrāhmaṇāse</b>ti. <b>Ye kecī</b>ti sabbena sabbaṁ sabbathā sabbaṁ asesaṁ nissesaṁ pariyādiyanavacanametaṁ— ye kecīti. <b>Samaṇā</b>ti ye keci ito bahiddhā pabbajjūpagatā paribbājakasamāpannā. <b>Brāhmaṇā</b>ti ye keci bhovādikāti— ye kecime samaṇabrāhmaṇāse. <b>Nandāti bhagavā</b>ti. <b>Nandā</b>ti bhagavā taṁ brāhmaṇaṁ nāmena ālapati. <b>Bhagavā</b>ti gāravādhivacanametaṁ …pe… sacchikā paññatti, yadidaṁ bhagavāti— nandāti bhagavā. <b>Diṭṭhassutenāpi vadanti suddhin</b>ti diṭṭhenāpi suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharanti; sutenapi suddhiṁ …pe… diṭṭhassutenāpi suddhiṁ visuddhiṁ parisuddhiṁ muttiṁ vimuttiṁ parimuttiṁ vadanti kathenti bhaṇanti dīpayanti voharantīti— diṭṭhassutenāpi vadanti suddhiṁ.