<b>Kissa hetu musā bhaṇe</b>ti. <b>Kissa hetū</b>ti kissa hetu kiṁhetu kiṅkāraṇā kiṁnidānā kiṁpaccayāti— kissa hetu. <b>Musā bhaṇe</b>ti musā bhaṇeyya katheyya dīpeyya vohareyya; <b>musā bhaṇe</b>ti mosavajjaṁ bhaṇeyya, musāvādaṁ bhaṇeyya, anariyavādaṁ bhaṇeyya. Idhekacco sabhaggato vā parisaggato vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho— “ehambho purisa, yaṁ jānāsi taṁ vadehī”ti, so ajānaṁ vā āha—“jānāmī”ti, jānaṁ vā āha—“na jānāmī”ti, apassaṁ vā āha—“passāmī”ti, passaṁ vā āha—“na passāmī”ti. Iti attahetu vā parahetu vā āmisakiñcikkhahetu vā sampajānamusā bhāsati, idaṁ vuccati mosavajjaṁ. Api ca tīhākārehi musāvādo hoti. Pubbevassa hoti— “musā bhaṇissan”ti, bhaṇantassa hoti— “musā bhaṇāmī”ti, bhaṇitassa hoti— “musā mayā bhaṇitan”ti— imehi tīhākārehi musāvādo hoti. Api ca catūhākārehi musāvādo hoti. Pubbevassa hoti— “musā bhaṇissan”ti, bhaṇantassa hoti— “musā bhaṇāmī”ti, bhaṇitassa hoti— “musā mayā bhaṇitan”ti, vinidhāya diṭṭhiṁ— imehi catūhākārehi musāvādo hoti. Api ca pañcahākārehi …pe… chahākārehi … sattahākārehi … aṭṭhahākārehi musāvādo hoti. Pubbevassa hoti— “musā bhaṇissan”ti, bhaṇantassa hoti— “musā bhaṇāmī”ti, bhaṇitassa hoti— “musā mayā bhaṇitan”ti, vinidhāya diṭṭhiṁ, vinidhāya khantiṁ, vinidhāya ruciṁ, vinidhāya saññaṁ, vinidhāya bhāvaṁ— imehi aṭṭhahākārehi musāvādo hoti mosavajjaṁ. Kissa hetu musā bhaṇeyya katheyya dīpeyya vohareyyāti— kissa hetu musā bhaṇe. Tenāha thero piṅgiyo— “Pārāyanamanugāyissaṁ, (iccāyasmā piṅgiyo) Yathāddakkhi tathākkhāsi; Vimalo bhūrimedhaso, Nikkāmo nibbano nāgo; Kissa hetu musā bhaṇe”ti. <b>Pahīnamalamohassa,</b> <b>mānamakkhappahāyino;</b> <b>Handāhaṁ kittayissāmi,</b> <b>giraṁ vaṇṇūpasañhitaṁ. </b>
