<b>Akiñcanaṁ kāmabhave asattan</b>ti. <b>Akiñcanan</b>ti rāgakiñcanaṁ dosakiñcanaṁ mohakiñcanaṁ mānakiñcanaṁ diṭṭhikiñcanaṁ kilesakiñcanaṁ duccaritakiñcanaṁ. Yassetāni kiñcanāni pahīnāni samucchinnāni vūpasantāni paṭippassaddhāni abhabbuppattikāni ñāṇagginā daḍḍhāni, so vuccati akiñcano. <b>Kāmā</b>ti uddānato dve kāmā— vatthukāmā ca kilesakāmā ca …pe… ime vuccanti vatthukāmā …pe… ime vuccanti kilesakāmā. <b>Bhavā</b>ti dve bhavā— kammabhavo ca paṭisandhiko ca punabbhavo …pe… ayaṁ paṭisandhiko punabbhavo. <b>Akiñcanaṁ kāmabhave asattan</b>ti akiñcanaṁ puggalaṁ kāme ca bhave ca asattaṁ alaggaṁ alaggitaṁ apalibuddhaṁ nikkhantaṁ nissaṭaṁ vippamuttaṁ visaññuttaṁ vimariyādikatena cetasā viharantanti— akiñcanaṁ kāmabhave asattaṁ. Tenāha bhagavā— “Nirāsaso so na ca āsasāno, Paññāṇavā so na ca paññakappī; Evampi todeyya muniṁ vijāna, Akiñcanaṁ kāmabhave asattan”ti. Saha gāthāpariyosānā …pe… satthā me bhante bhagavā, sāvakohamasmīti. Todeyyamāṇavapucchāniddeso navamo. Pārāyanavagganiddesa Pucchāniddesa
10. Kappamāṇavapucchāniddesa