<b>Sandiṭṭhikamakālikan</b>ti sandiṭṭhikaṁ akālikaṁ ehipassikaṁ opaneyyikaṁ paccattaṁ veditabbaṁ viññūhīti— evaṁ sandiṭṭhikaṁ. Atha vā, yo diṭṭheva dhamme ariyaṁ aṭṭhaṅgikaṁ maggaṁ bhāveti, tassa maggassa anantarā samanantarā adhigacchateva phalaṁ vindati paṭilabhatīti— evampi sandiṭṭhikaṁ. <b>Akālikan</b>ti yathā manussā kālikaṁ dhanaṁ datvā anantarā na labhanti, kālaṁ āgamenti, nevāyaṁ dhammo. Yo diṭṭheva dhamme ariyaṁ aṭṭhaṅgikaṁ maggaṁ bhāveti; tassa maggassa anantarā samanantarā adhigacchateva phalaṁ vindati paṭilabhati, na parattha na paraloke, evaṁ akālikanti— sandiṭṭhikamakālikaṁ. <b>Taṇhakkhayamanītikan</b>ti. <b>Taṇhā</b>ti rūpataṇhā …pe… dhammataṇhā. <b>Taṇhakkhayan</b>ti taṇhakkhayaṁ rāgakkhayaṁ dosakkhayaṁ mohakkhayaṁ gatikkhayaṁ upapattikkhayaṁ paṭisandhikkhayaṁ bhavakkhayaṁ saṁsārakkhayaṁ vaṭṭakkhayaṁ. <b>Anītikan</b>ti <b>īti</b> vuccanti kilesā ca khandhā ca abhisaṅkhārā ca. Ītippahānaṁ ītivūpasamaṁ ītipaṭinissaggaṁ ītipaṭippassaddhiṁ amataṁ nibbānanti— taṇhakkhayamanītikaṁ. <b>Yassa natthi upamā kvacī</b>ti. <b>Yassā</b>ti nibbānassa. <b>Natthi upamā</b>ti upamā natthi, upanidhā natthi, sadisaṁ natthi, paṭibhāgo natthi na atthi na saṁvijjati nupalabbhati. <b>Kvacī</b>ti kvaci kimhici katthaci ajjhattaṁ vā bahiddhā vā ajjhattabahiddhā vāti— yassa natthi upamā kvaci. Tenāha so brāhmaṇo— “Yo te dhammamadesesi, Sandiṭṭhikamakālikaṁ; Taṇhakkhayamanītikaṁ, Yassa natthi upamā kvacī”ti. <b>Nāhaṁ tamhā vippavasāmi,</b> <b>Muhuttamapi brāhmaṇa;</b> <b>Gotamā bhūripaññāṇā,</b> <b>Gotamā bhūrimedhasā. </b>