ราชาปิ ตํ เวสฺสวโณ กุเวโร

อุเปติ ธมฺมํ ปริปุจฺฉมาโน

ตสฺสาปิ ตฺวํ ปุจฺฉิโต พฺรวีสิ ๑

โส จาปิ สุตฺวาน ปตีตรูโป ฯ

เย เกจิเม ติตฺถิยา วาทสีลา

อาชีวกา วา ยทิ วา นิคนฺถา

ปญฺญาย ตํ นาติตรนฺติ สพฺเพ

ฐิโต วชนฺตํ วิย สีฆคามึ ฯ

เย เกจิเม พฺราหฺมณา วาทสีลา

วุฑฺฒา วาปิ ๒ พฺราหฺมณา สนฺติ เกจิ

สพฺเพ ตยี อตฺถพทฺธา ภวนฺติ

เย จาปิ ๓ อญฺเญ วาทิโน มญฺญมานา ฯ

อยญฺหิ ธมฺโม นิปุโณ สุโข จ

โยยํ ตยา ภควา สุปฺปวุตฺโต

ตเมว สพฺเพ ๔ มยํ สุสฺสุมานา ๕

ตํ โน วท ๖ ปุจฺฉิโต พุทฺธเสฏฺฐ ฯ

สพฺเพปิเม ภิกฺขโว สนฺนิสินฺนา

อุปาสกา จาปิ ตตฺเถว โสตุํ

สุณนฺตุ ธมฺมํ วิมเลนานุพุทฺธํ

#๑ ม. ยุ. พฺรูสิ ธีร ฯ ๒ ม. ยุ. จาปิ ฯ ๓ ยุ. วาปิ จญฺเญ ฯ ๔ ม. สพฺเพปิ ฯ #๕ ม. ยุ. สุสฺสูสมานา ฯ ๖ ยุ. ตวนฺโน ฯ