เทวมนุสฺเสสุ กปฺปิเยสุ

กปฺปํ เนติ ตมาหุ นฺหาตโกติ ฯ

อาคุํ น กโรติ กิญฺจิ โลเก

สพฺพสํโยเค วิสชฺช พนฺธนานิ

สพฺพตฺถ น สชฺชตี วิปฺปมุตฺโต ๑

นาโค ตาทิ ปวุจฺจเต ตถตฺตาติ ฯ

[๓๖๘] อถ โข สภิโย ปริพฺพาชโก ฯเปฯ ภควนฺตํ อุตฺตรึ ปญฺหํ อปุจฺฉิ

กํ เขตฺตชินํ วทนฺติ พุทฺธา (อิติ สภิโย)

กุสลํ เกน กถญฺจ ปณฺฑิโตติ

มุนิ นาม กถํ ปวุจฺจติ

ปุฏฺโฐ เม ภควา พฺยากโรหิ ฯ

เขตฺตานิ วิเจยฺย เกวลานิ (สภิยาติ ภควา)

ทิพฺพํ ๒ มานุสกญฺจ พฺรหฺมเขตฺตํ

(สพฺพ) เขตฺตมูลพนฺธนา ปมุตฺโต

เขตฺตชิโน ตาทิ ปวุจฺจเต ตถตฺตา ฯ

โกสานิ วิเจยฺย เกวลานิ

ทิพฺพํ มานุสกญฺจ พฺรหฺมโกสํ

(สพฺพ) โกสมูลพนฺธนา ปมุตฺโต

กุสโล ตาทิ ปวุจฺจเต ตถตฺตา ฯ

#๑ ม. ยุ. วิมุตฺโต ฯ ๒ โป. ทิพฺยํ ฯ ยุ. ทิวยํ ฯ