นาหํ กุมาเร อหิตมนุสฺสรามิ

น จาปิ อสฺส ภวิสฺสติ อนฺตราโย

น โอรกายํ อธิมนสา ๑ ภวาถ ฯ

สมฺโพธิยคฺคํ ผุสิสฺสตายํ กุมาโร

โส ธมฺมจกฺกํ ปรมวิสุทฺธทสฺสี

วตฺเตสฺสตายํ พหุชนหิตานุกมฺปี

วิตฺถาริกสฺส ภวิสฺสติ พฺรหฺมจริยํ ฯ

มมญฺจ อายุ น จิรมิธาวเสโส

อถนฺตรา เม ภวิสฺสติ กาลกิริยา

โสหํ น สุสฺสํ ๒ อสมธุรสฺส ธมฺมํ

เตนมฺหิ อฏฺโฏ พฺยสนคโต ๓ อฆาวี ฯ

โส สากิยานํ วิปุลํ ชเนตฺวาน ปีตึ

อนฺเตปุรมฺหา นิรคมา ๔ พฺรหฺมจารี

โส ภาคิเนยฺยํ สยํ อนุกมฺปมาโน

สมาทเปสิ อสมธุรสฺส ธมฺเม

พุทฺโธติ โฆสํ ยทิ ปรโต สุณาสิ

สมฺโพธิปตฺโต วิวรติ ๕ ธมฺมมคฺคํ

คนฺตฺวาน ตตฺถ สยํ ๖ ปริปุจฺฉมาโน

จรสฺสุ ตสฺมึ ภควติ พฺรหฺมจริยํ ฯ

เตนานุสิฏฺโฐ หิตมเนน ตาทินา

#๑ ม. อธิมานสา ฯ ๒ ม. โสสฺสํ ฯ ๓ โป. ม. พฺยสนงฺคโต ฯ ๔ โป. ม. นิคมา ฯ #๕ ยุ. วีจรติ ฯ ๖ ม. ยุ. สมยํ ฯ