ยถา สิมฺพลิโน สารํ อเนฺวสํ นาธิคจฺฉติ

เอวํ อเนฺวสมานา นํ ปญฺหํ นาชฺฌคมามเส ฯ

อเทเส วต โน วุฏฺฐํ กุญฺชรานํวนูทเก

สกาเส ทุมฺมนุสฺสานํ พาลานํ อวิชานตํ

อุพฺเพธติ เม หทยํ มุขญฺจ ปริสุสฺสติ

นิพฺพุตึ นาธิคจฺฉามิ อคฺคิทฑฺโฒว อาตเป ฯ

กมฺมารานํ ยถา อุกฺกา อนฺโต ฌายติ โน พหิ

เอวมฺปิ หทยํ มยฺหํ อนฺโต ฌายติ โน พหิ ฯ

[๖๔๗] ตโต โส ปณฺฑิโต ธีโร อตฺถทสฺสี มโหสโธ

เวเทหํ ทุกฺขิตํ ทิสฺวา อิทํ วจนมพฺรวิ ฯ

มา ตฺวํ ภายิ มหาราช มา ตฺวํ ภายิ รเถสภ

อหนฺตํ โมจยิสฺสามิ ราหุคฺคหิตํว จนฺทิมํ ฯ

มา ตฺวํ ภายิ มหาราช มา ตฺวํ ภายิ รเถสภ

อหนฺตํ โมจยิสฺสามิ ราหุคฺคหิตํว สุริยํ ฯ

มา ตฺวํ ภายิ มหาราช มา ตฺวํ ภายิ รเถสภ

อหนฺตํ โมจยิสฺสามิ ปงฺเก สนฺนํว กุญฺชรํ ฯ

มา ตฺวํ ภายิ มหาราช มา ตฺวํ ภายิ รเถสภ

อหนฺตํ โมจยิสฺสามิ เปฬพนฺธํว ปนฺนคํ ฯ

มา ตฺวํ ภายิ มหาราช มา ตฺวํ ภายิ รเถสภ

อหนฺตํ โมจยิสฺสามิ ปกฺขึ พนฺธํว ปญฺชเร ฯ