Nahetu dhammo hetussa ca nahetussa ca dhammassa adhipatipaccayena paccayo— ārammaṇādhipati, sahajātādhipati. <b>Ārammaṇādhipati</b>—dānaṁ datvā sīlaṁ …pe… uposathakammaṁ katvā taṁ garuṁ katvā paccavekkhati, taṁ garuṁ katvā nahetū khandhā ca hetū ca uppajjanti, pubbe suciṇṇāni. (Yāva vatthu nahetū khandhā, ca tāva kātabbaṁ.) <b>Sahajātādhipati</b>—nahetu adhipati sampayuttakānaṁ khandhānaṁ hetūnañca cittasamuṭṭhānānañca rūpānaṁ adhipatipaccayena paccayo. Hetu ca nahetu ca dhammā hetussa dhammassa adhipatipaccayena paccayo. <b>Ārammaṇādhipati</b>—hetuñca sampayuttake ca khandhe garuṁ katvā hetū uppajjanti. Hetu ca nahetu ca dhammā nahetussa dhammassa adhipatipaccayena paccayo. <b>Ārammaṇādhipati</b>—hetuñca sampayuttake ca khandhe garuṁ katvā nahetū khandhā uppajjanti. Hetu ca nahetu ca dhammā hetussa ca nahetussa ca dhammassa adhipatipaccayena paccayo. <b>Ārammaṇādhipati</b>—hetuñca sampayuttake ca khandhe garuṁ katvā hetū ca sampayuttakā ca khandhā uppajjanti. Anantara Hetu dhammo hetussa dhammassa anantarapaccayena paccayo—purimā purimā hetū pacchimānaṁ pacchimānaṁ hetūnaṁ anantarapaccayena paccayo. Hetu dhammo nahetussa dhammassa anantarapaccayena paccayo—purimā purimā hetū pacchimānaṁ pacchimānaṁ nahetūnaṁ khandhānaṁ anantarapaccayena paccayo. Hetu dhammo hetussa ca nahetussa ca dhammassa anantarapaccayena paccayo— purimā purimā hetū pacchimānaṁ pacchimānaṁ hetūnaṁ sampayuttakānañca khandhānaṁ anantarapaccayena paccayo.
