Ahetukaṁ dhammaṁ paṭicca ahetuko dhammo uppajjati napurejātapaccayā—arūpe ahetukaṁ ekaṁ khandhaṁ …pe… dve khandhe …pe… ahetuke khandhe paṭicca cittasamuṭṭhānaṁ rūpaṁ, vicikicchāsahagataṁ uddhaccasahagataṁ mohaṁ paṭicca cittasamuṭṭhānaṁ rūpaṁ; paṭisandhikkhaṇe …pe…. (Yāva asaññasattā tāva vitthāro.) Ahetukaṁ dhammaṁ paṭicca sahetuko dhammo uppajjati napurejātapaccayā—arūpe vicikicchāsahagataṁ uddhaccasahagataṁ mohaṁ paṭicca sampayuttakā khandhā; paṭisandhikkhaṇe vatthuṁ paṭicca sahetukā khandhā. Ahetukaṁ dhammaṁ paṭicca sahetuko ca ahetuko ca dhammā uppajjanti napurejātapaccayā—paṭisandhikkhaṇe vatthuṁ paṭicca sahetukā khandhā, mahābhūte paṭicca kaṭattārūpaṁ.