Nahetuṁ sahetukañca nahetuṁ ahetukañca dhammaṁ paṭicca nahetu sahetuko dhammo uppajjati hetupaccayā—paṭisandhikkhaṇe nahetuṁ sahetukaṁ ekaṁ khandhañca vatthuñca paṭicca tayo khandhā …pe… dve khandhe ca …pe…. Nahetuṁ sahetukañca nahetuṁ ahetukañca dhammaṁ paṭicca nahetu ahetuko dhammo uppajjati hetupaccayā—nahetū sahetuke khandhe ca mahābhūte ca paṭicca cittasamuṭṭhānaṁ rūpaṁ; paṭisandhikkhaṇe …pe…. Nahetuṁ sahetukañca nahetuṁ ahetukañca dhammaṁ paṭicca nahetu sahetuko ca nahetu ahetuko ca dhammā uppajjanti hetupaccayā—paṭisandhikkhaṇe nahetuṁ sahetukaṁ ekaṁ khandhañca vatthuñca paṭicca tayo khandhā …pe… dve khandhe …pe… nahetū sahetuke khandhe ca mahābhūte ca paṭicca kaṭattārūpaṁ. Ārammaṇa Nahetuṁ sahetukaṁ dhammaṁ paṭicca nahetu sahetuko dhammo uppajjati ārammaṇapaccayā—nahetuṁ sahetukaṁ ekaṁ khandhaṁ paṭicca tayo khandhā …pe… dve khandhe …pe… paṭisandhikkhaṇe …pe…. Nahetuṁ ahetukaṁ dhammaṁ paṭicca nahetu ahetuko dhammo uppajjati ārammaṇapaccayā—nahetuṁ ahetukaṁ ekaṁ khandhaṁ paṭicca tayo khandhā …pe… paṭisandhikkhaṇe …pe…. Nahetuṁ ahetukaṁ dhammaṁ paṭicca nahetu sahetuko dhammo uppajjati ārammaṇapaccayā—paṭisandhikkhaṇe vatthuṁ paṭicca nahetū sahetukā khandhā. Nahetuṁ sahetukañca nahetuṁ ahetukañca dhammaṁ paṭicca nahetu sahetuko dhammo uppajjati ārammaṇapaccayā—paṭisandhikkhaṇe nahetuṁ sahetukaṁ ekaṁ khandhañca vatthuñca paṭicca tayo khandhā …pe… dve khandhe …pe…. (Saṅkhittaṁ. Evaṁ vibhajitabbaṁ.) Saṅkhyāvāra Suddha