Hetū ca nahetū ca dhammā nahetussa dhammassa vippayuttapaccayena paccayo— sahajātaṁ, pacchājātaṁ. <b>Sahajātā</b>—hetū ca sampayuttakā ca khandhā cittasamuṭṭhānānaṁ rūpānaṁ vippayuttapaccayena paccayo; paṭisandhikkhaṇe hetū ca sampayuttakā ca khandhā kaṭattārūpānaṁ vippayuttapaccayena paccayo. <b>Pacchājātā</b>—hetū ca sampayuttakā ca khandhā purejātassa imassa kāyassa vippayuttapaccayena paccayo. Atthyādi Hetu dhammo hetussa dhammassa atthipaccayena paccayo—alobho adosassa amohassa atthipaccayena paccayo (cakkaṁ). Lobho mohassa atthipaccayena paccayo (cakkaṁ); paṭisandhikkhaṇe …pe…. Hetu dhammo nahetussa dhammassa atthipaccayena paccayo—sahajātaṁ, pacchājātaṁ. <b>Sahajātā</b>—hetū sampayuttakānaṁ khandhānaṁ cittasamuṭṭhānānañca rūpānaṁ atthipaccayena paccayo; paṭisandhikkhaṇe …pe…. <b>Pacchājātā</b>—hetū purejātassa imassa kāyassa atthipaccayena paccayo. Hetu dhammo hetussa ca nahetussa ca dhammassa atthipaccayena paccayo—alobho adosassa amohassa sampayuttakānaṁ khandhānaṁ cittasamuṭṭhānānañca rūpānaṁ atthipaccayena paccayo. (Cakkaṁ.) Lobho mohassa sampayuttakānaṁ khandhānaṁ cittasamuṭṭhānānañca rūpānaṁ atthipaccayena paccayo (cakkaṁ); paṭisandhikkhaṇe …pe….