Ahetuko dhammo sahetukassa dhammassa adhipatipaccayena paccayo. <b>Ārammaṇādhipati</b>—ariyā nibbānaṁ garuṁ katvā paccavekkhanti; nibbānaṁ gotrabhussa, vodānassa, maggassa, phalassa adhipatipaccayena paccayo; cakkhuṁ …pe… vatthuṁ … ahetuke khandhe garuṁ katvā assādeti abhinandati; taṁ garuṁ katvā rāgo uppajjati, diṭṭhi uppajjati. Anantara Sahetuko dhammo sahetukassa dhammassa anantarapaccayena paccayo—purimā purimā sahetukā khandhā pacchimānaṁ pacchimānaṁ sahetukānaṁ khandhānaṁ anantarapaccayena paccayo; anulomaṁ gotrabhussa … anulomaṁ vodānassa … gotrabhu maggassa … vodānaṁ maggassa … maggo phalassa … phalaṁ phalassa … anulomaṁ phalasamāpattiyā … nirodhā vuṭṭhahantassa nevasaññānāsaññāyatanaṁ phalasamāpattiyā anantarapaccayena paccayo. Sahetuko dhammo ahetukassa dhammassa anantarapaccayena paccayo—purimā purimā vicikicchāsahagatā uddhaccasahagatā khandhā pacchimassa pacchimassa vicikicchāsahagatassa uddhaccasahagatassa mohassa anantarapaccayena paccayo; sahetukaṁ cuticittaṁ ahetukassa upapatticittassa anantarapaccayena paccayo; sahetukaṁ bhavaṅgaṁ āvajjanāya anantarapaccayena paccayo; sahetukaṁ bhavaṅgaṁ ahetukassa bhavaṅgassa anantarapaccayena paccayo; sahetukā khandhā ahetukassa vuṭṭhānassa anantarapaccayena paccayo. Sahetuko dhammo sahetukassa ca ahetukassa ca dhammassa anantarapaccayena paccayo—purimā purimā vicikicchāsahagatā uddhaccasahagatā khandhā pacchimānaṁ pacchimānaṁ vicikicchāsahagatānaṁ uddhaccasahagatānaṁ khandhānaṁ mohassa ca anantarapaccayena paccayo.