Ahetukaṁ dhammaṁ paccayā ahetuko dhammo …pe…. (Paṭiccavārasadisaṁyeva.) Ahetukaṁ dhammaṁ paccayā sahetuko dhammo uppajjati hetupaccayā—vatthuṁ paccayā sahetukā khandhā, vicikicchāsahagataṁ uddhaccasahagataṁ mohaṁ paccayā sampayuttakā khandhā; paṭisandhikkhaṇe vatthuṁ paccayā sahetukā khandhā. Ahetukaṁ dhammaṁ paccayā sahetuko ca ahetuko ca dhammā uppajjanti hetupaccayā— vatthuṁ paccayā sahetukā khandhā, mahābhūte paccayā cittasamuṭṭhānaṁ rūpaṁ, vicikicchāsahagataṁ uddhaccasahagataṁ mohaṁ paccayā sampayuttakā khandhā cittasamuṭṭhānañca rūpaṁ; paṭisandhikkhaṇe vatthuṁ …pe…. Sahetukañca ahetukañca dhammaṁ paccayā sahetuko dhammo uppajjati hetupaccayā— sahetukaṁ ekaṁ khandhañca vatthuñca paccayā tayo khandhā …pe… dve khandhe …pe… vicikicchāsahagataṁ uddhaccasahagataṁ ekaṁ khandhañca mohañca paccayā tayo khandhā …pe… dve khandhe …pe… paṭisandhikkhaṇe …pe…. Sahetukañca ahetukañca dhammaṁ paccayā ahetuko dhammo uppajjati hetupaccayā— sahetuke khandhe ca mahābhūte ca paccayā cittasamuṭṭhānaṁ rūpaṁ, vicikicchāsahagate uddhaccasahagate khandhe ca mohañca paccayā cittasamuṭṭhānaṁ rūpaṁ; paṭisandhikkhaṇe …pe….