Ganthañca noganthañca dhammaṁ paṭicca gantho dhammo uppajjati hetupaccayā— sīlabbataparāmāsaṁ kāyaganthañca sampayuttake ca khandhe paṭicca abhijjhākāyagantho. (Cakkaṁ.) Ganthañca noganthañca dhammaṁ paṭicca nogantho dhammo uppajjati hetupaccayā— noganthaṁ ekaṁ khandhañca ganthe ca paṭicca tayo khandhā cittasamuṭṭhānañca rūpaṁ …pe… dve khandhe ca …pe… ganthe ca sampayuttake khandhe ca paṭicca cittasamuṭṭhānaṁ rūpaṁ. Ganthañca noganthañca dhammaṁ paṭicca gantho ca nogantho ca dhammā uppajjanti hetupaccayā—noganthaṁ ekaṁ khandhañca sīlabbataparāmāsakāyaganthañca paṭicca tayo khandhā abhijjhākāyagantho cittasamuṭṭhānañca rūpaṁ …pe… dve khandhe ca …pe…. (Cakkaṁ. Saṅkhittaṁ.) Ārammaṇapaccayā …pe… avigatapaccayā. Saṅkhyāvāra Suddha Hetuyā nava, ārammaṇe nava, adhipatiyā nava (sabbattha nava), vipāke ekaṁ, āhāre nava …pe… avigate nava. Anulomaṁ. 2.5.1.1.2. Paccayapaccanīya Vibhaṅgavāra Nahetu Noganthaṁ dhammaṁ paṭicca nogantho dhammo uppajjati nahetupaccayā—ahetukaṁ noganthaṁ ekaṁ khandhaṁ paṭicca tayo khandhā cittasamuṭṭhānañca rūpaṁ …pe… dve khandhe …pe… ahetukapaṭisandhikkhaṇe (yāva asaññasattā), vicikicchāsahagate uddhaccasahagate khandhe paṭicca vicikicchāsahagato uddhaccasahagato moho. Naārammaṇādi Ganthaṁ dhammaṁ paṭicca nogantho dhammo uppajjati naārammaṇapaccayā—ganthe paṭicca cittasamuṭṭhānaṁ rūpaṁ.