Hetuṁ dhammaṁ paṭicca nahetu dhammo uppajjati napurejātapaccayā—arūpe hetuṁ paṭicca sampayuttakā khandhā, hetuṁ paṭicca cittasamuṭṭhānaṁ rūpaṁ; paṭisandhikkhaṇe …pe…. Hetuṁ dhammaṁ paṭicca hetu ca nahetu ca dhammā uppajjanti napurejātapaccayā— arūpe alobhaṁ paṭicca adoso amoho sampayuttakā ca khandhā (cakkaṁ). Lobhaṁ paṭicca moho sampayuttakā ca khandhā (cakkaṁ); paṭisandhikkhaṇe …pe…. Nahetuṁ dhammaṁ paṭicca nahetu dhammo uppajjati napurejātapaccayā—arūpe nahetuṁ ekaṁ khandhaṁ paṭicca tayo khandhā …pe… nahetū khandhe paṭicca cittasamuṭṭhānaṁ rūpaṁ; paṭisandhikkhaṇe …pe… ekaṁ mahābhūtaṁ …pe…. Nahetuṁ dhammaṁ paṭicca hetu dhammo uppajjati napurejātapaccayā—arūpe nahetū khandhe paṭicca hetū; paṭisandhikkhaṇe …pe…. Nahetuṁ dhammaṁ paṭicca hetu ca nahetu ca dhammā uppajjanti napurejātapaccayā— arūpe nahetuṁ ekaṁ khandhaṁ paṭicca tayo khandhā hetu ca …pe… dve khandhe …pe… paṭisandhikkhaṇe …pe…. Hetuñca nahetuñca dhammaṁ paṭicca hetu dhammo uppajjati napurejātapaccayā— arūpe alobhañca sampayuttake ca khandhe paṭicca adoso amoho (cakkaṁ). Arūpe lobhañca sampayuttake ca khandhe paṭicca moho (cakkaṁ); paṭisandhikkhaṇe …pe….