“Taṇhā janeti purisaṁ, cittamassa vidhāvati; Satto saṁsāramāpādi, kammaṁ tassa parāyanan”ti.

6. Jarāvagga

Uppathasutta “Kiṁsu uppatho akkhāto, kiṁsu rattindivakkhayo; Kiṁ malaṁ brahmacariyassa, kiṁ sinānamanodakan”ti. “Rāgo uppatho akkhāto, Vayo rattindivakkhayo; Itthī malaṁ brahmacariyassa, Etthāyaṁ sajjate pajā; Tapo ca brahmacariyañca, Taṁ sinānamanodakan”ti.

6. Jarāvagga

Dutiyasutta “Kiṁsu dutiyā purisassa hoti, Kiṁsu cenaṁ pasāsati; Kissa cābhirato macco, Sabbadukkhā pamuccatī”ti. “Saddhā dutiyā purisassa hoti, Paññā cenaṁ pasāsati; Nibbānābhirato macco, Sabbadukkhā pamuccatī”ti.

6. Jarāvagga

Kavisutta “Kiṁsu nidānaṁ gāthānaṁ, kiṁsu tāsaṁ viyañjanaṁ; Kiṁsu sannissitā gāthā, kiṁsu gāthānamāsayo”ti. “Chando nidānaṁ gāthānaṁ, akkharā tāsaṁ viyañjanaṁ; Nāmasannissitā gāthā, kavi gāthānamāsayo”ti. Jarāvaggo chaṭṭho. Tassuddānaṁ