2.1. Hetugocchaka Namo tassa Bhagavato Arahato Sammāsambuddhassa. 2.1.1. Hetuduka 2.1.1.1. Paṭiccavāra 2.1.1.1.1. Paccayānuloma Vibhaṅgavāra Hetu Hetuṁ dhammaṁ paṭicca hetu dhammo uppajjati hetupaccayā—alobhaṁ paṭicca adoso amoho, adosaṁ paṭicca alobho amoho, amohaṁ paṭicca alobho adoso, lobhaṁ paṭicca moho, mohaṁ paṭicca lobho, dosaṁ paṭicca moho, mohaṁ paṭicca doso; paṭisandhikkhaṇe …pe…. Hetuṁ dhammaṁ paṭicca nahetu dhammo uppajjati hetupaccayā—hetuṁ dhammaṁ paṭicca sampayuttakā khandhā cittasamuṭṭhānañca rūpaṁ; paṭisandhikkhaṇe …pe…. Hetuṁ dhammaṁ paṭicca hetu ca nahetu ca dhammā uppajjanti hetupaccayā—alobhaṁ paṭicca adoso amoho sampayuttakā ca khandhā cittasamuṭṭhānañca rūpaṁ (cakkaṁ). Lobhaṁ paṭicca moho sampayuttakā ca khandhā cittasamuṭṭhānañca rūpaṁ …pe… paṭisandhikkhaṇe …pe….