Ganthaṁ dhammaṁ paṭicca gantho dhammo uppajjati hetupaccayā— sīlabbataparāmāsaṁ kāyaganthaṁ paṭicca abhijjhākāyagantho, abhijjhākāyaganthaṁ paṭicca sīlabbataparāmāso kāyagantho, idaṁsaccābhinivesaṁ kāyaganthaṁ paṭicca abhijjhākāyagantho, abhijjhākāyaganthaṁ paṭicca idaṁsaccābhiniveso kāyagantho. Ganthaṁ dhammaṁ paṭicca nogantho dhammo uppajjati hetupaccayā—ganthe paṭicca sampayuttakā khandhā cittasamuṭṭhānañca rūpaṁ. Ganthaṁ dhammaṁ paṭicca gantho ca nogantho ca dhammā uppajjanti hetupaccayā— sīlabbataparāmāsaṁ kāyaganthaṁ paṭicca abhijjhākāyagantho sampayuttakā ca khandhā cittasamuṭṭhānañca rūpaṁ. (Cakkaṁ.) Noganthaṁ dhammaṁ paṭicca nogantho dhammo uppajjati hetupaccayā—noganthaṁ ekaṁ khandhaṁ paṭicca tayo khandhā cittasamuṭṭhānañca rūpaṁ …pe… dve khandhe …pe… paṭisandhikkhaṇe …pe… khandhe paṭicca vatthu, vatthuṁ paṭicca khandhā, ekaṁ mahābhūtaṁ …pe…. Noganthaṁ dhammaṁ paṭicca gantho dhammo uppajjati hetupaccayā—noganthe khandhe paṭicca ganthā. Noganthaṁ dhammaṁ paṭicca gantho ca nogantho ca dhammā uppajjanti hetupaccayā— noganthaṁ ekaṁ khandhaṁ paṭicca tayo khandhā ganthā ca cittasamuṭṭhānañca rūpaṁ …pe… dve khandhe …pe….