Hetuyā nava, ārammaṇe nava, adhipatiyā nava, anantare nava, samanantare nava (sabbattha nava), vipāke ekaṁ, āhāre nava …pe… avigate nava. Anulomaṁ. 2.8.1.1.2. Paccayapaccanīya Vibhaṅgavāra Nahetu Nīvaraṇaṁ dhammaṁ paṭicca nīvaraṇo dhammo uppajjati nahetupaccayā— vicikicchānīvaraṇaṁ paṭicca avijjānīvaraṇaṁ, uddhaccanīvaraṇaṁ paṭicca avijjānīvaraṇaṁ. Nonīvaraṇaṁ dhammaṁ paṭicca nonīvaraṇo dhammo uppajjati nahetupaccayā— ahetukaṁ nonīvaraṇaṁ ekaṁ khandhaṁ paṭicca tayo khandhā cittasamuṭṭhānañca rūpaṁ …pe… dve …pe… ahetukapaṭisandhikkhaṇe …pe…. (Yāva asaññasattā.) Nonīvaraṇaṁ dhammaṁ paṭicca nīvaraṇo dhammo uppajjati nahetupaccayā— vicikicchāsahagate uddhaccasahagate khandhe paṭicca avijjānīvaraṇaṁ. Nīvaraṇañca nonīvaraṇañca dhammaṁ paṭicca nīvaraṇo dhammo uppajjati nahetupaccayā—vicikicchānīvaraṇañca sampayuttake ca khandhe paṭicca avijjānīvaraṇaṁ, uddhaccanīvaraṇañca sampayuttake ca khandhe paṭicca avijjānīvaraṇaṁ. Naārammaṇādi Nīvaraṇaṁ dhammaṁ paṭicca nonīvaraṇo dhammo uppajjati naārammaṇapaccayā— nīvaraṇe paṭicca cittasamuṭṭhānaṁ rūpaṁ. Nonīvaraṇaṁ dhammaṁ paṭicca nonīvaraṇo dhammo uppajjati naārammaṇapaccayā— nonīvaraṇe khandhe paṭicca cittasamuṭṭhānaṁ rūpaṁ; paṭisandhikkhaṇe …pe…. (Yāva asaññasattā.)