Sahetuko ca ahetuko ca dhammā ahetukassa dhammassa pacchājātapaccayena paccayo—pacchājātā vicikicchāsahagatā uddhaccasahagatā khandhā ca moho ca purejātassa imassa kāyassa pacchājātapaccayena paccayo. Sahetuko dhammo sahetukassa dhammassa āsevanapaccayena paccayo. (Anantarasadisaṁ. Āvajjanampi bhavaṅgampi natthi, āsevanapaccaye vajjetabbā navapi.) Kamma Sahetuko dhammo sahetukassa dhammassa kammapaccayena paccayo—sahajātā, nānākkhaṇikā. <b>Sahajātā</b>—sahetukā cetanā sampayuttakānaṁ khandhānaṁ kammapaccayena paccayo; paṭisandhikkhaṇe …pe…. <b>Nānākkhaṇikā</b>—sahetukā cetanā vipākānaṁ sahetukānaṁ khandhānaṁ kammapaccayena paccayo. Sahetuko dhammo ahetukassa dhammassa kammapaccayena paccayo—sahajātā, nānākkhaṇikā. <b>Sahajātā</b>—sahetukā cetanā cittasamuṭṭhānānaṁ rūpānaṁ kammapaccayena paccayo; paṭisandhikkhaṇe …pe…. <b>Nānākkhaṇikā</b>—sahetukā cetanā vipākānaṁ ahetukānaṁ khandhānaṁ kaṭattā ca rūpānaṁ kammapaccayena paccayo.