Tena samayena buddho bhagavā sāvatthiyaṁ viharati jetavane anāthapiṇḍikassa ārāme. Tena kho pana samayena bhikkhuniyo attano bhaṇḍakaṁ apassantiyo caṇḍakāḷiṁ bhikkhuniṁ etadavocuṁ— “apāyye, amhākaṁ bhaṇḍakaṁ passeyyāsī”ti? Caṇḍakāḷī bhikkhunī ujjhāyati khiyyati vipāceti— “ahameva nūna corī, ahameva nūna alajjinī, yā ayyāyo attano bhaṇḍakaṁ apassantiyo tā maṁ evamāhaṁsu— ‘apāyye, amhākaṁ bhaṇḍakaṁ passeyyāsī’ti? Sacāhaṁ, ayye, tumhākaṁ bhaṇḍakaṁ gaṇhāmi, assamaṇī homi, brahmacariyā cavāmi, nirayaṁ upapajjāmi; yā pana maṁ abhūtena evamāha sāpi assamaṇī hotu, brahmacariyā cavatu, nirayaṁ upapajjatū”ti. Yā tā bhikkhuniyo appicchā …pe… tā ujjhāyanti khiyyanti vipācenti— “kathañhi nāma ayyā caṇḍakāḷī attānampi parampi nirayenapi brahmacariyenapi abhisapissatī”ti …pe… “saccaṁ kira, bhikkhave, caṇḍakāḷī bhikkhunī attānampi parampi nirayenapi brahmacariyenapi abhisapatī”ti? “Saccaṁ, bhagavā”ti. Vigarahi buddho bhagavā …pe… kathañhi nāma, bhikkhave, caṇḍakāḷī bhikkhunī attānampi parampi nirayenapi brahmacariyenapi abhisapissati. Netaṁ, bhikkhave, appasannānaṁ vā pasādāya …pe… evañca pana, bhikkhave, bhikkhuniyo imaṁ sikkhāpadaṁ uddisantu— “Yā pana bhikkhunī attānaṁ vā paraṁ vā nirayena vā brahmacariyena vā abhisapeyya, pācittiyan”ti. Yā panāti yā yādisā …pe… bhikkhunīti …pe… ayaṁ imasmiṁ atthe adhippetā bhikkhunīti. Attānanti paccattaṁ. Paranti upasampannaṁ. Nirayena vā brahmacariyena vā abhisapati, āpatti pācittiyassa.