Bhikkhunīti bhikkhikāti bhikkhunī; bhikkhācariyaṁ ajjhupagatāti bhikkhunī; bhinnapaṭadharāti bhikkhunī; samaññāya bhikkhunī; paṭiññāya bhikkhunī; ehi bhikkhunīti bhikkhunī; tīhi saraṇagamanehi upasampannāti bhikkhunī; bhadrā bhikkhunī; sārā bhikkhunī; sekhā bhikkhunī; asekhā bhikkhunī; samaggena ubhatosaṅghena ñatticatutthena kammena akuppena ṭhānārahena upasampannāti bhikkhunī. Tatra yāyaṁ bhikkhunī samaggena ubhatosaṅghena ñatticatutthena kammena akuppena ṭhānārahena upasampannā, ayaṁ imasmiṁ atthe adhippetā bhikkhunīti. Avassutā nāma sārattā apekkhavatī paṭibaddhacittā. Avassuto nāma sāratto apekkhavā paṭibaddhacitto. Purisapuggalo nāma manussapuriso na yakkho na peto na tiracchānagato viññū paṭibalo kāyasaṁsaggaṁ samāpajjituṁ. Adhakkhakanti heṭṭhakkhakaṁ. Ubbhajāṇumaṇḍalanti uparijāṇumaṇḍalaṁ. Āmasanaṁ nāma āmaṭṭhamattaṁ. Parāmasanaṁ nāma itocito ca sañcopanaṁ. Gahaṇaṁ nāma gahitamattaṁ. Chupanaṁ nāma phuṭṭhamattaṁ. Paṭipīḷanaṁ vā sādiyeyyāti aṅgaṁ gahetvā nippīḷanaṁ sādiyati. Ayampīti purimāyo upādāya vuccati.