Yā tā bhikkhuniyo appicchā …pe… tā ujjhāyanti khiyyanti vipācenti— “kathañhi nāma ayyā caṇḍakāḷī saṁsaṭṭhā viharissati gahapatināpi gahapatiputtenapī”ti …pe… “saccaṁ kira, bhikkhave, caṇḍakāḷī bhikkhunī saṁsaṭṭhā viharati gahapatināpi gahapatiputtenapī”ti? “Saccaṁ, bhagavā”ti. Vigarahi buddho bhagavā …pe… kathañhi nāma, bhikkhave, caṇḍakāḷī bhikkhunī saṁsaṭṭhā viharissati gahapatināpi gahapatiputtenapi. Netaṁ, bhikkhave, appasannānaṁ vā pasādāya …pe… evañca pana, bhikkhave, bhikkhuniyo imaṁ sikkhāpadaṁ uddisantu— “Yā pana bhikkhunī saṁsaṭṭhā vihareyya gahapatinā vā gahapatiputtena vā sā bhikkhunī bhikkhunīhi evamassa vacanīyā— ‘māyye, saṁsaṭṭhā vihari gahapatināpi gahapatiputtenapi. Viviccāyye; vivekaññeva bhaginiyā saṅgho vaṇṇetī’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṁ samanubhāsitabbā tassa paṭinissaggāya. Yāvatatiyañce samanubhāsīyamānā taṁ paṭinissajjeyya, iccetaṁ kusalaṁ; no ce paṭinissajjeyya, pācittiyan”ti. Yā panāti yā yādisā …pe… bhikkhunīti …pe… ayaṁ imasmiṁ atthe adhippetā bhikkhunīti. Saṁsaṭṭhā nāma ananulomikena kāyikavācasikena saṁsaṭṭhā. Gahapati nāma yo koci agāraṁ ajjhāvasati. Gahapatiputto nāma ye keci puttabhātaro. Sā bhikkhunīti yā sā saṁsaṭṭhā bhikkhunī.