“Yā pana bhikkhunī samaggena saṅghena ukkhittaṁ bhikkhuṁ dhammena vinayena satthusāsanena anādaraṁ appaṭikāraṁ akatasahāyaṁ tamanuvatteyya, sā bhikkhunī bhikkhunīhi evamassa vacanīyā— ‘eso kho, ayye, bhikkhu samaggena saṅghena ukkhitto dhammena vinayena satthusāsanena anādaro appaṭikāro akatasahāyo, māyye, etaṁ bhikkhuṁ anuvattī’ti. Evañca sā bhikkhunī bhikkhunīhi vuccamānā tatheva paggaṇheyya, sā bhikkhunī bhikkhunīhi yāvatatiyaṁ samanubhāsitabbā tassa paṭinissaggāya. Yāvatatiyañce samanubhāsiyamānā taṁ paṭinissajjeyya, iccetaṁ kusalaṁ. No ce paṭinissajjeyya, ayampi pārājikā hoti asaṁvāsā ukkhittānuvattikā”ti. Yā panāti yā yādisā …pe… bhikkhunīti …pe… ayaṁ imasmiṁ atthe adhippetā bhikkhunīti. Samaggo nāma saṅgho samānasaṁvāsako samānasīmāyaṁ ṭhito. Ukkhitto nāma āpattiyā adassane vā appaṭikamme vā appaṭinissagge vā ukkhitto. Dhammena vinayenāti yena dhammena yena vinayena. Satthusāsanenāti jinasāsanena buddhasāsanena. Anādaro nāma saṅghaṁ vā gaṇaṁ vā puggalaṁ vā kammaṁ vā nādiyati. Appaṭikāro nāma ukkhitto anosārito. Akatasahāyo nāma samānasaṁvāsakā bhikkhū vuccanti sahāyā. So tehi saddhiṁ natthi, tena vuccati akatasahāyoti. Tamanuvatteyyāti yaṁdiṭṭhiko so hoti yaṅkhantiko yaṁruciko, sāpi taṁdiṭṭhikā hoti taṅkhantikā taṁrucikā. Sā bhikkhunīti yā sā ukkhittānuvattikā bhikkhunī.