ยถา โกมุทิเก มาเส พหู ปุปฺผนฺติ ปาทปา

ตเถวาหมฺปิ สมเย ปุปฺผิโตมฺหิ มเหสินา ๑ ฯ

วิริยํ เม ธุรโธรยฺหํ โยคกฺเขมาธิวาหนํ

นาโคว พนฺธนํ เฉตฺวา วิหรามิ อนาสโว ฯ

สตสหสฺเส อิโต กปฺเป ยํ พุทฺธมภิกิตฺตยึ

ทุคฺคตึ นาภิชานามิ กิตฺตนาย อิทํ ผลํ ฯ

กิเลสา ฌาปิตา มยฺหํ ภวา สพฺเพ สมูหตา

นาโคว พนฺธนํ เฉตฺวา วิหรามิ อนาสโว ฯ

สฺวาคตํ วต เม อาสิ มม พุทฺธสฺส สนฺติเก

ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อายสฺมา ปุฬินุปฺปาทโก เถโร อิมา คาถาโย อภาสิตฺถาติ ฯ

ปุฬินุปฺปาทกตฺเถรสฺส อปทานํ สมตฺตํ ฯ

อฏฺฐมํ ตรณิยตฺเถราปทานํ (๔๘๘)

[๗๘] อตฺถทสฺสี ตุ ภควา สยมฺภู โลกนายโก

วินตานทิยา ๒ ตีเร ๓ อุปคญฺฉิ ตถาคโต ฯ

อุทกา อภินิกฺขมฺม กจฺฉโป วาริโคจโร

พุทฺธํ ตริตุกาโมหํ ๔ อุเปสึ โลกนายกํ ฯ #๑ โป. ยุ. มเหสิโน ฯ ๒ ยุ. จินตานทิยา ฯ ๓ ม. ตีรํ ฯ ๔ ม. ตาเรตุกาโมหํ ฯ