อิตฺถํ สุทํ อายสฺมา ปุฬินถูปิโย เถโร อิมา คาถาโย อภาสิตฺถาติ ฯ

ปุฬินถูปิยตฺเถรสฺส อปทานํ สมตฺตํ ฯ

นวมํ นฬกุฏิกทายกตฺเถราปทานํ (๔๙๙)

[๘๙] หิมวนฺตสฺสวิทูเร หาริโก ๑ นาม ปพฺพโต

สยมฺภู นารโท นาม รุกฺขมูเล วสิ ตทา ฯ

นฬาคารํ กริตฺวาน ติเณน ฉาทยึ อหํ

จงฺกมํ โสธยิตฺวาน สยมฺภุสฺส อทาสหํ ฯ

เตน กมฺเมน สุกเตน เจตนาปณิธีหิ จ

ชหิตฺวา มานุสํ เทหํ ตาวตึสํ อคจฺฉหํ ฯ

ตตฺถ เม สุกตํ พฺยมฺหํ นฬกุฏิกาย นิมฺมิตํ

สฏฺฐิโยชนมุพฺพิทฺธํ ๒ ตึสโยชนวิตฺถตํ ฯ

จตุทฺทเสสุ กปฺเปสุ เทวโลเก รมึ อหํ

เอกสตฺตติกฺขตฺตุญฺจ เทวรชฺชํ อการยึ ฯ

จตุตฺตึสติกฺขตฺตุญฺจ ๓ จกฺกวตฺติ อโหสหํ

ปเทสรชฺชํ วิปุลํ คณนาโต อสงฺขยํ ฯ

ธมฺมปาสาทมารุยฺห สุญฺญาคารวรูปคํ

ยถิจฺฉกาหํ วิหเร สกฺยปุตฺตสฺส สาสเน ฯ

เอกตฺตึเส อิโต กปฺเป ยํ กมฺมมกรึ ตทา

ทุคฺคตึ นาภิชานามิ นฬกุฏิกายิทํ ผลํ ฯ #๑ ม. หาริโต ฯ ยุ. ภาริโก ฯ ๒ ม. สพฺพตฺถ ...มุพฺเพธํ ฯ ๓ โป. ยุ. #จตุตฺตึสกฺขตฺตุญฺเจว ฯ ๔ ม. ยุ. สพฺพาการวรูปมํ ฯ