อิตฺถํ สุทํ อายสฺมา อชฺชุนปุปฺผิโย เถโร อิมา คาถาโย อภาสิตฺถาติ ฯ
อชฺชุนปุปฺผิยตฺเถรสฺส อปทานํ สมตฺตํ ฯ
สตฺตมํ กุฏชปุปฺผิยตฺเถราปทานํ (๕๑๗)
[๑๐๗] หิมวนฺตสฺส อวิทูเร อจฺจโล ๑ นาม ปพฺพโต
พุทฺโธ สุทสฺสโน นาม วสนฺโต ๒ ปพฺพตนฺตเร ฯ
ปุปฺผํ เหมวนฺตํ คยฺห เวหาสํ อคมาสหํ
ตตฺถทฺทสาสึ สมฺพุทฺธํ โอฆติณฺณมนาสวํ ฯ
ปุปฺผํ กุฏชมาทาย สิเร กตฺวานหนฺตทา ๓
พุทฺธสฺส อภิโรเปสึ สยมฺภุสฺส มเหสิโน ฯ
เอกตฺตึเส อิโต กปฺเป ยํ ปุปฺผมภิปูชยึ
ทุคฺคตึ นาภิชานามิ พุทฺธปูชายิทํ ผลํ ฯ
กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา กุฏชปุปฺผิโย เถโร อิมา คาถาโย อภาสิตฺถาติ ฯ
กุฏชปุปฺผิยตฺเถรสฺส อปทานํ สมตฺตํ ฯ
#๑ ม. วสโล ฯ ยุ. จาวโล ฯ ๒ ม. ยุ. วสเต ฯ ๓ ม. ... กตฺวาน อญฺชลึ ฯ