ปภา นิทฺธาวเต ตสฺส สตรํสีว อุคฺคโต
อากิณฺโณ เทวกญฺญาหิ อาโมทึ กามกามิหํ ฯ
เทวโลกา จวิตฺวาน สุกฺกมูเลน โจทิโต
อาคนฺตฺวาน มนุสฺสตฺตํ ปตฺโตมฺหิ อาสวกฺขยํ ฯ
จตุนวุเต อิโต กปฺเป นิสีทนมกาสหํ
ทุคฺคตึ นาภิชานามิ ติณมุฏฺเฐ อิทํ ผลํ ฯ
กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา ติณมุฏฺฐิทายโก เถโร อิมา คาถาโย อภาสิตฺถาติ ฯ
ติณมุฏฺฐิทายกตฺเถรสฺส อปทานํ สมตฺตํ ฯ
ทุติยํ เวจฺจกทายกตฺเถราปทานํ (๕๒๒)
[๑๑๒] วิปสฺสิโน ภควโต โลกเชฏฺฐสฺส ตาทิโน
เอกํ ๑ เวจฺจํ มยา ทินฺนํ ปสนฺเนน สปาณินา ฯ
หตฺถิยานํ อสฺสยานํ ทิพฺพยานํ สมชฺฌคํ
เตน เวจฺจกทาเนน ๒ ปตฺโตมฺหิ อาสวกฺขยํ ฯ #๑ ม. เอกมญฺจํ ฯ ยุ. เอกเปจฺฉํ ฯ ๒ ม. มญฺจกทาเนน ฯ ยุ. เปจฺฉกทาเนน ฯ