อิตฺถํ สุทํ อายสฺมา อพฺภญฺชนทายโก เถโร อิมา คาถาโย อภาสิตฺถาติ ฯ
อพฺภญฺชนทายกตฺเถรสฺส อปทานํ สมตฺตํ ฯ
ปญฺจมํ สุปฏทายกตฺเถราปทานํ ๑ (๕๒๕)
[๑๑๕] ทิวาวิหารา นิกฺขนฺโต วิปสฺสี โลกนายโก
ลหุํ สุปฏิกํ ๒ ทตฺวา กปฺปํ สคฺคมฺหิ โมทหํ ฯ
เอกนวุเต อิโต กปฺเป ยํ สุปฏิกมทาสหํ
ทุคฺคตึ นาภิชานามิ สุปฏสฺส อิทํ ผลํ ฯ
กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
สฺวาคตํ วต เม อาสิ พุทฺธเสฏฺฐสฺส สนฺติเก
ติสฺโส วิชฺชา อนุปฺปตฺตา กตํ พทฺธสฺส สาสนํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา สุปฏทายโก เถโร อิมา คาถาโย อภาสิตฺถาติ ฯ
สุปฏทายกตฺเถรสฺส อปทานํ สมตฺตํ ฯ
ฉฏฺฐํ ทณฺฑทายกตฺเถราปทานํ (๕๒๖)
[๑๑๖] กานนํ วนโมคฺคยฺห เวฬฬ เฉตฺวานหํ ตทา
อาลมฺพนํ กริตฺวาน สงฺฆสฺส อททึ อหํ ๓ ฯ #๑ ม. ยุ. ปูปปวทายกตฺเถร... ฯ ๒ ม. สุปฏกํ ฯ ๓ ม. พหุํ ฯ