เตน จิตฺตปฺปสาเทน สุพฺพเต อภิวาทยึ ๑

อาลมฺพทณฺฑํ ทตฺวาน ปกฺกามึ อุตฺตรามุโข ฯ

จตุนวุเต อิโต กปฺเป ยํ ทณฺฑมททึ ตทา

ทุคฺคตึ นาภิชานามิ ทณฺฑทานสฺสิทํ ผลํ ฯ

กิเลสา ฌาปิตา มยฺหํ ภวา สพฺเพ สมูหตา

นาโคว พนฺธนํ เฉตฺวา วิหรามิ อนาสโว ฯ

สฺวาคตํ วต เม อาสิ มม พุทฺธสฺส สนฺติเก

ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ

ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนนฺติ ฯ

อิตฺถํ สุทํ อายสฺมา ทณฺฑทายโก เถโร อิมา คาถาโย อภาสิตฺถาติ ฯ

ทณฺฑทายกตฺเถรสฺส อปทานํ สมตฺตํ ฯ

เตวีสติมํ ภาณวารํ ฯ

สตฺตมํ คิริเนลปูชกตฺเถราปทานํ (๕๒๗)

[๑๑๗] มิคลุทฺโธ ปุเร อาสึ วิวเน วิจรํ อหํ

อทฺทสํ วิรชํ พุทฺธํ สพฺพธมฺมาน ปารคุํ ฯ

ตสฺมึ มหาการุณิเก สพฺพสตฺตหิเต รเต

ปสนฺนจิตฺโต สุมโน เนลปุปฺผํ อปูชยึ ฯ #๑ ม. ยุ. อภิวาทิย ฯ