สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ
ปฏิสมฺภิทา จตสฺโส วิโมกฺขาปิจ อฏฺฐิเม
ฉฬภิญฺญา สจฺฉิกตา กตํ พุทฺธสฺส สาสนนฺติ ฯ
อิตฺถํ สุทํ อายสฺมา โพธิสมฺมชฺชโก เถโร อิมา คาถาโย อภาสิตฺถาติ ฯ
โพธิสมฺมชฺชกตฺเถรสฺส อปทานํ สมตฺตํ ฯ
นวมํ อามณฺฑผลทายกตฺเถราปทานํ (๕๒๙)
[๑๑๙] ปทุมุตฺตโร นาม ชิโน สพฺพธมฺมาน ปารคู
วุฏฺฐหิตฺวา สมาธิมฺหา จงฺกมิ โลกนายโก ฯ
ขาริภารํ คเหตฺวาน อาหรนฺโต ผลํ ตทา
อทฺทสํ วิรชํ พุทฺธํ จงฺกมนฺตํ มหามุนึ ฯ
ปสนฺนจิตฺโต สุมโน สิเร กตฺวาน อญฺชลึ
สมฺพุทฺธํ อภิวาเทตฺวา อามณฺฑมททึ ผลํ ฯ
สตสหสฺเส อิโต กปฺเป ยํ ผลํ อททึ ตทา
ทุคฺคตึ นาภิชานามิ อามณฺฑสฺส อิทํ ผลํ ฯ
กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วีหรามิ อนาสโว ฯ
สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ