ปเทสรชฺชํ วิปุลํ คณนาโต อสงฺขยํ

สพฺพตฺถ สุขิโต อาสึ ตสฺส กมฺมสฺส วาหสา ฯ

เอกนวุเต อิโต กปฺเป วิปสฺสี นาม นายโก

อุปฺปชฺชิ จารุนยโน ๑ สพฺพธมฺมวิปสฺสโก ฯ

ทุฏฺฐจิตฺโต อุปวทึ สาวกํ ตสฺส ตาทิโน

สพฺพาสวปริกฺขีณํ สุทฺโธติ จ วิชานิย ฯ

ตสฺเสว นรวีรสฺส สาวกานํ มเหสินํh

สลากํ จ คเหตฺวาน ขีโรทนมทาสหํ ฯ

อิมมฺหิ ภทฺทเก กปฺเป พฺรหฺมพนฺธุ มหายโส

กสฺสโป นาม นาเมน อุปฺปชฺชิ วทตํ วโร ฯ

สาสนํ โชตยิตฺวาน ๒ อภิภุยฺย กุติตฺถิเย

เวเนยฺเย วินยิตฺวาน นิพฺพุโต โส สสาวโก ฯ

สสิสฺเส นิพฺพุเต นาเถ อตฺถเมนฺตมฺหิ สาสเน

เทวา กนฺทึสุ สํวิคฺคา มุตฺตเกสา รุทมุขา ฯ

นิพฺพายิสฺสติ ธมฺมกฺโข น ปสฺสิสฺสาม สุพฺพเต

น สุณิสฺสาม สทฺธมฺมํ อโห โน อปฺปปุญฺญตา ฯ

ตทายํ ปฐวี สพฺพา อจลา สา ปุลาปุลี ๓

สาคโร จ สโสโกว วินที กรุณํ คิรํ ฯ

จตุทฺทิสา ทุนฺทุภิโย นาทยึสุ อมานุสา

สมนฺตโต อสนิโย ปตึสุ ๔ จ ภยาวหา ฯ #๑ ม. จารุทสฺสโน ฯ ๒ ยุ. ...โส ฯ ๓ ม. ยุ. จลาจลา ฯ ๔ ม. ผลึสุ ฯ