อิตฺถํ สุทํ กิสาโคตมี ภิกฺขุนี อิมา คาถาโย อภาสิตฺถาติ ฯ
กิสาโคตมีเถริยา อปทานํ สมตฺตํ ฯ
ตติยํ ธมฺมทินฺนาเถริยาปทานํ (๒๓)
[๑๖๓] ปทุมุตฺตโร นาม ชิโน สพฺพธมฺมาน ปารคู
อิโต สตสหสฺสมฺหิ กปฺเป อุปฺปชฺชิ นายโก ฯ
ตทาหํ หํสวติยา กุเล อญฺญตเร อหุ
ปรกมฺมํ ๑ กรี อาสึ นิปกา สีลสํวุตา ฯ
ปทุมุตฺตรสฺส พุทฺธสฺส สุชาโต อคฺคสาวโก
วิหารา อภินิกฺขมฺม ปิณฺฑปาตาย คจฺฉติ ฯ
ฆฏํ คเหตฺวา คจฺฉนฺตี ตทา อุทกหาริกา
ตํ ทิสฺวา อททึ ปูวํ ๒ ปสนฺนา เสหิ ปาณิภิ ฯ
ปฏิคฺคเหตฺวา ตตฺเถว นิสินฺโน ปริภุญฺชิ โส
ตโต เนตฺวาน ตํ เคหํ อทาสึ ตสฺส โภชนํ ฯ
ตโต เม อยฺยโก ตุฏฺโฐ อกาสิ ๓ สุณิสํ สกํ
สสฺสุยา สห คนฺตฺวาน สมฺพุทฺธํ อภิวาทยึ ฯ
ตทา โส ธมฺมกถิกํ ภิกฺขุนึ ปริกิตฺตยํ
ฐเปสิ เอตทคฺคมฺหิ ตํ สุตฺวา มุทิตา อหํ ฯ
นิมนฺตยิตฺวา สุคตํ สสงฺฆํ โลกนายกํ
มหาทานํ ททิตฺวาน ตํ ฐานํ อภิปตฺถยึ ฯ #๑ ม. ยุ. ปรกมฺมการี ฯ ๒ ยุ. สูปํ ฯ ๓ ม. ยุ. อกรี ฯ