อนุมคฺเคน สมฺพุทฺโธ ยํ ธมฺมํ อภินีหริ

อนุโภตฺวา สุขทุกฺขํ ปตฺโต โพธึ มหามุนิ ฯ

พฺรหฺมเทวญฺจ สมฺพุทฺธํ โคตมํ โลกนายกํ

อญฺเญสํ โลกนาถานํ สงฺคมนฺเต พหุํ มยา ฯ

อธิการํ พหุํ มยฺหํ ตุยฺหตฺถาย มหามุนิ

คเวสนฺตี ๑ พุทฺธธมฺมํ อหนฺเต ปริจาริกา ฯ

กปฺปสตสหสฺเส จ จตุโร จ อสงฺขเย

ทีปงฺกโร มหาวีโร อุปฺปชฺชิ โลกนายโก ฯ

ปจฺจนฺตเทสวิสเย นิมนฺเตตฺวา ตถาคตํ

ตสฺส อาคมนํ มคฺคํ โสเธนฺติ ตุฏฺฐมานสา ฯ%

เตน กาเลน โส อาสิ สุเมโธ นาม พฺราหฺมโณ

มคฺคญฺจ ปฏิยาเทสิ อายโต สพฺพทสฺสิโน ฯ

เตน กาเลนหํ อาสึ กญฺญา พฺราหฺมณสมฺภวา

สุมิตฺตา นาม นาเมน อุปคญฺฉึ สมาคมํ ฯ

อฏฺฐ อุปฺปลหตฺถานิ ปูชนตฺถาย สตฺถุโน

อาทาย ชนสฺส มชฺเฌ อทฺทสํ อิสิมุตฺตมํ ๒ ฯ

จิรานุคตํ ทยิตํ ๓ อติกฺกนฺตํ ๔ มโนหรํ

ทิสฺวา ตทา อมญฺญิสฺสํ สผลํ ชีวิตํ มม ฯ

ปรกฺกมนฺตํ สผลํ อทฺทสํ อิสิโน ตทา

ปุพฺพกมฺเมน สมฺพุทฺเธ จิตฺตญฺจาปิ ปสีทิ เม ฯ #๑ ม. คเวสโต ฯ ยุ. คเวสนฺตา ฯ ๒ ม. ยุ. อิสิมุคฺคตํ ฯ ๓ ยุ. ทสฺสิตํ ฯ ๔ ยุ. #ปฏิกฺกนฺตํ ฯ