อปริเมยฺเย อิโต กปฺเป ยํ มํ พุทฺโธ วิยากริ

ตํ วาจํ อนุโมทนฺตี เอวํการี ภวึ อหํ ฯ

ตสฺส กมฺมสฺส สุกตสฺส ตตฺถ จิตฺตํ ปสาทยึ

เทวมานุสกํ โยนึ อนุโภตฺวา อสงฺขยํ ฯ

สุขทุกฺขํ อนุโภตฺวาน ๑ เทเวสุ มานุเสสุ จ

ปจฺฉิเม ภวสมฺปตฺเต อชายึ สากิเย กุเล ฯ

รูปวตี โภควตี ยสสีลวตี ตโต

สพฺพงฺคสมฺปทา โหมิ กุเลสุ ปติสกฺกตา ๒ ฯ

ลาภสิโลกสกฺการํ โลกธมฺมสมาคมํ

จิตฺตญฺจ ทุกฺขิตํ นตฺถิ วสามิ อกุโตภยา ฯ

วุตฺตํ เหตํ ภควตา รญฺโญ อนฺเตปุเร ตทา

ขตฺติยานํ ปุเร วีร อุปการญฺจ ๓ นิทฺทิสิ ฯ

อุปการา จ ยา นารี ยา จ นารี สุเข ทุกฺเข

อตฺถกฺขายี จ ยา นารี ยา นารี จานุกมฺปิกา ฯ

ปญฺจโกฏิสตา พุทฺธา นวโกฏิสตานิ จ

เอเตสํ เทวเทวานํ มหาทานํ ปวตฺตยึ ฯ

อธิการํ มหา ๔ มยฺหํ มหาราช ๕ สุโณหิ เม

เอกาทสโกฏิสตา โหนฺติ ๖ โลกคฺคนายกา ฯ

เอเตสํ เทวเทวานํ มหาทานํ ปวตฺตยึ

อธิการํ มหา มยฺหํ มหาราช สุโณหิ เม ฯ #๑ ม. สุขทุกฺเขนุโภตฺวาหํ ฯ ยุ. สุขทุกฺเขนุโภตฺวาน ฯ ๒ ม. อภิสกฺกตา ฯ ยุ. #อติสกฺกตา ฯ ๓ ยุ. อุปการตฺถญฺจ ฯ ๔ ยุ. สทา ฯ อิโต ปรํ อีทิสเมว ฯ #๕ ม. ธมฺมราชา ฯ อิโต ปรํ อีทิสเมว ฯ ๖ ม. พุทฺธา ทฺวาทสโกฏิโย ฯ