ปฏิสมฺภิทา จตสฺโส วิโมกฺขาปิจ อฏฺฐิเม

ฉฬภิญฺญา สจฺฉิกตา กตํ พุทฺธสฺส สาสนํ ฯ

เอวํ พหุวิธํ ทุกฺขํ สมฺปตฺตึ จ พหุพฺพิธํ

วิสุทฺธภาวสมฺปตฺตา ลภามิ สพฺพสมฺปทา ฯ

โย ๑ ททาติ สกตฺตานํ ปุญฺญตฺถาย มเหสิโน

สหายสมฺปทา โหนฺติ นิพฺพานปทมสงฺขตํ ฯ

ปริกฺขีณํ อตีตญฺจ ปจฺจุปฺปนฺนํ อนาคตํ

สพฺพกมฺมํ มมํ ขีณํ ปาเท วนฺทามิ จกฺขุมาติ ฯ

อิตฺถํ สุทํ ยโสธรา ภิกฺขุนี ภควโต สมฺมุขา อิมา คาถาโย

อภาสิตฺถาติ ฯ

ยโสธราเถริยา อปทานํ สมตฺตํ ฯ

นวมํ ทสสหสฺสเถริยาปทานํ (๒๙)

[๑๖๙] กปฺเป สตสหสฺเส จ จตุโร จ อสงฺขเย

ทีปงฺกโร นาม ชิโน อุปฺปชฺชิ โลกนายโก ฯ

ทีปงฺกโร มหาวีโร วิยากาสิ วินายโก

สุเมธญฺจ สุมิตฺตญฺจ สมานสุขทุกฺขตํ ฯ

สเทวกญฺจ ปสฺสนฺโต วิจรนฺโต สเทวกํ

เตสํ ปกิตฺตเน อเมฺห ๒ อุปคมฺม สมาคมํ ฯ #๑ ม. ยา ฯ ๒ ยุ. อมฺห ฯ