ชาตา สุรูปา ๑ ทยิตา ปูชนียา ๒ ชนสฺส จ ฯ

อุปคนฺตฺวา มหาวีรํ วิปสฺสึ โลกนายกํ

ธมฺมํ สุตฺวาน สรณํ อุเปสึ นรนายกํ ฯ

สีเลสุ สํวุตา หุตฺวา นิพฺพุเต จ นรุตฺตเม

ธาตุถูปสฺส อุปริ โสณฺณฉตฺตํ อปูชยึ ฯ

มุตฺตจาคา สีลวตี ยาวชีวํ ตโต จุตา

ชหิตฺวา มานุสํ เทหํ ตาวตึสํ ๓ อคญฺฉหํ ฯ

ตทา ทสหิ ฐาเนหิ อภิโภตฺวา ๔ อเสสโต

รูปสทฺเทหิ คนฺเธหิ รเสหิ ผุสฺสเนหิ จ ฯ

อายุนาปิจ ๕ วณฺเณน สุเขน ยสสาปิจ

ตเถวาธิปเตยฺเยน อธิคยฺห วิโรจหํ ฯ

ปจฺฉิเม จ ภเว ทานิ ชาตาหํ กปิลวฺหเย

ธีตา เขมกสกฺกสฺส ๖ นนฺทา นาเมน วิสฺสุตา ฯ

อภิรูปสมฺปทมฺปิ อาหุ เมกนฺติ สูจกํ

ยทาหํ โยพฺพนํ ปตฺตา รูปวณฺณวิภูสิตา ฯ

อิธ ๗ มมตฺเต สกฺยานํ วิวาโท สุมหา อหุ

ปพฺพาเชสิ ตโต ตาโต มา สกฺยา วินสฺสุํ ๘ อิติ ฯ

ปพฺพชิตฺวาน ๙ ตถาคตํ รูปเทสฺสึ นรุตฺตมํ

สุตฺวาน โนปคจฺฉามิ มม รูเปน คพฺภิตา ฯ #๑ โป. ยุ. สุรูปทสฺสิตา ฯ ๒ โป. สชนสฺส จหํ สทา ฯ ยุ. สชนสฺสา-ชนสฺส จ ฯ #๓ ม. ตาวตึสูปคา อหํ ฯ ๔ ม. ยุ. อภิโภตฺวาน เสสเก ฯ ๕ โป. ยากาสิ ปญฺจวณฺเณน ฯ #๖ โป. สุขสกฺกสฺส ฯ ๗ ม. ตทา มมตฺเถ ฯ ยุ อิทํ เม มตฺเถสกฺยานํ ฯ สกฺยานํ ฯ #๘ ม. วินสฺสึ สุติ ฯ ๙ ม. ปพฺพชิตฺวา ตถาคตํ ฯ ยุ. ปพฺพชิตฺวา ตถาจาหํ ฯ