อิตฺถํ สุทํ อายสฺมา ปาฏิหิรสญฺญโก เถโร อิมา คาถาโย อภาสิตฺถาติ ฯ
ปาฏิหิรสญฺญกตฺเถรสฺส อปทานํ สมตฺตํ ฯ
จตุตฺถํ ญาณตฺถวิกตฺเถราปทานํ (๔๓๔)
[๒๔] กณิการํว ชลิตํ ทีปรุกฺขํว โชติตํ
กญฺจนํว วิโรจนฺตํ อทฺทสํ ทิปทุตฺตมํ ฯ
กมณฺฑลล ฐเปตฺวาน วากจีรญฺจ กุณฺฑิกํ
เอกํสํ อชินํ กตฺวา พุทฺธเสฏฺฐํ ถวึ อหํ ฯ
ตมนฺธการํ วิธมํ โมหชาลสมากุลํ
ญาณาโลกํ ทสฺสยิตฺวา ติณฺโณ ๑ อสิ ตุวํ มุนิ ฯ
สมุทฺธรสิมํ โลกํ สพฺพาวนฺตํ อนุตฺตรํ
ญาเณน เต อุปมา นตฺถิ ยาวตา ชคโต ๒ คติ ฯ
เตน ญาเณน สพฺพญฺญู สพฺพญฺญูติ ปวุจฺจติ
วนฺทามิ ตํ มหาวีรํ สพฺพญฺญุตํ อนาสวํ ฯ
สตสหสฺเส อิโต กปฺเป พุทฺธเสฏฺฐํ ถวึ อหํ
ทุคฺคตึ นาภิชานามิ ญาณตฺถุมนายิทํ ผลํ ฯ
กิเลสา ฌาปิตา มยฺหํ ภวา สพฺเพ สมูหตา
นาโคว พนฺธนํ เฉตฺวา วิหรามิ อนาสโว ฯ
สฺวาคตํ วต เม อาสิ มม พุทฺธสฺส สนฺติเก
ติสฺโส วิชฺชา อนุปฺปตฺตา กตํ พุทฺธสฺส สาสนํ ฯ #๑ ม. ยุ. นิตฺติณฺโณสิ มหามุนิ ฯ ๒ ยุ. จ คโต คติ ฯ