พฺรหฺมุนา ยาจิโต สนฺโต เวสฺสภู โลกนายโก

วตฺตจกฺโก ๑ มหาวีโร อรุเณปิ ๒ นรุตฺตโม ฯ

โสโณ จ อุตฺตโร เจว อเหสุํ อคฺคสาวกา

อุปสนฺโต นามุปฏฺฐาโก เวสฺสภุสฺส มเหสิโน ฯ

รามา เจว สมาลา นาม ๓ อเหสุํ อคฺคสาวิกา

โพธิ ตสฺส ภควโต มหาสาโลติ วุจฺจติ ฯ

โสตฺถิโก เจว รมฺโม จ อเหสุํ อคฺคุปฏฺฐกา

โคตมี จ สิริมา จ อเหสุํ อคฺคุปฏฺฐิกา ฯ

สฏฺฐิรตนมุพฺเพโธ เหมยูปสมูปโม

กายา นิจฺฉรติ รํสิ รตฺตึว ปพฺพเต สิขี ฯ

สฏฺฐิวสฺสสหสฺสานิ อายุ ตสฺส มเหสิโน

ตาวตา ติฏฺฐมาโน โส ตาเรสิ ชนตํ พหุํ ฯ

ธมฺมํ วิตฺถาริกํ กตฺวา วิภชฺชิตฺวา มหาชนํ

ธมฺมนาวํ ฐเปตฺวาน นิพฺพุโต โส สสาวโก ฯ

ทสฺสเนยฺยํ สพฺพชนํ วิหารํ อิริยาปถํ

สพฺพํ สมนฺตรหิตํ นนุ ริตฺตา สพฺพสงฺขาราติ ฯ

เวสฺสภู ชินวโร สตฺถา เขมารามมฺหิ นิพฺพุโต

ธาตุวิตฺถารกํ อาสิ เตสุ เตสุ ปเทสโตติ ฯ

เวสฺสภูพุทฺธวํโส เอกวีสติโม ฯ

#๑ ม. วตฺติ จกฺกํ ฯ ๒ ม. อรุณาราเม ฯ ๓ ม. จ ฯ ยุ. ทามา เจว สมาลา จ ฯ